حادث معهد الأورام
في المعهد حجزوك سنتين
والدوا مر بجد ياناس
وصفوا كماوي علي الورمين
ورم الروح واللي في الراس
واما ابتدا وضعك يتحسن
قالوا ح تخرج م المستشفي
ومالوش لبس جديد في المخزن
والمحاليل ملهوش ماهي ناشفة
يخرج أحسن ع الدكتور
أهو يتعالح عنده هناك
واما يعدي يدوب السور
يمكن يجري يلف تراك
خرج الأبعد كدة م الموت
بس الموت كان مستنيه
هو يدوب بيعدي يفوت
والعربية انفجرت فيه
أصل الموت دة ملهش كبير
يحصد فينا بألف طريقة
مرة بقلة دوا وضمير
وتموت برضه بفعل حريقة
ولا الهم يعدي عليك
يقصف عمرك وانت سليم
والإرهاب ياابني يخليك
اعرج ومكسح وعقيم
هي بلدنا ح ترجع تاني
معجونة بمية عفاريت
كل ماتيجي تفوق بتعاني
يظهر إني خلاص عكيت
نفسي ف مرة اشوف الجاني
واتعلق ف رقبته ياريت
واتعلق ف رقبته ياريت.
شيخ السجالات
البدري زايد.
ليست هناك تعليقات:
إرسال تعليق