وانا نايم ومتوضي
وهي هدية لابي الله يرحمه
وانا نايم ومتوضي
قابلت ابويا في منامي
لاقيت أيده علي خدي
بتمسح عني احزاني
ومن نوره فرح قلبي
وصوته سمعته بوداني
ضحكلي وقالي يا ولدي
لحقت بسرعة تنساني
وفين في الدنيا ودتني
نسيت اسمي وعنواني
وانك ياما وريتني
وتدارى في احضاني
ولو شفتك في يوم تبكي
بتبقي عنيا وجعاني
ولو جسمك بدأ يشكي
بيسهر قلبي و بيعاني
واسمك جايبه من اسمي
زرعتك حتي في مكاني
و صورتك نفسها صورتي
وقيمتك تبقي في مقامي
وفي الدنيا بقيت تمشي
وبتحاسب كما الجاني
واخرتها تغيب عني
وترجع تاني تنساني
وجوه الارض تدفني
وتقعد ويا عزالي
ودود الارض يهضمني
وينخر جوه في عظامي
و ربك وحده يسترني
وعمره في يوما ما ينساني
ويغفر لي ويرحمني
و هو لوحده نجاني
وكنت اتمني لو تدعي
بدعوة تحلي ايامي
ولو سالو في يوم عني
فقول أنا ابويا خلاني
اكون راجل ومتربي
ويدعو للي رباني
وقالي مستحيل يا ابني
اشوفك تبكي قدامي
***"""""**"****"***"""
ابويا وعمري ماانسي
وكيف انسي اللي رباني
وهنسي ازاي وانا منك
ودمك جوه شرياني
وقلبي لوحده بيحبك
وصورتك لسه لبساني
و انا عايش علي سيرتك
وصوتك لسه في وداني
وبتمني اكون جنبك
وترجع ليا من تاني
ابوس ايدك وابوس خدك
واغنيلك في موالي
واحكي للجميع عنك
وافكر نفسي بالغالي
انا يا ابويا من بعدك
عنيا لسه وجعاني
وحالي كله متلخبط
وطعم المر في لساني
وقلبي يدق ويخبط
بيتمني تعود تاني
وطول الوقت بدعيلك
كما يارب رباني
حرم نفسه واكلني
وكبرني وخلاني
اعيش العمر اسجدلك
وذكرك يحلي بلساني
يارب الكون انا عبدك
وبدعي لعبدك الفاني
وكل العفو من عندك
وعفوك وحده نجاني
ابويا و عمره بيحبك
ويسجدلك ووصاني
بان العز في قربك
وفي بعدك
بلاقي نفسي نسياني
فترحم قلب بيحبك
وابويا يعود لاحضاني
ليست هناك تعليقات:
إرسال تعليق