تفانين ... للشاعر / حسن عمران

فنان من صغري بتجنن..

 لما تجيني لحظه أفنن..

 وأغيب وأداري عن الدنيا..

 وحروفي ف دماغي تدندن.. 

وبموت ف الشعر الموسيقي..

 وأهوي حركات الشيكا بيكا.. 

ف موالد أو حتي الأوبرا..

 وتسلطن وأبكي مع السيكا.. 

وانا معجب جدا ب سي رشدي..

 وب سمعة كمان أنور وجدي..

 والست فاتن.. وبشادية.. والموجي..

 وبليغ مع وردة.. 

وأعشق ثومة..والسنباطي.. 

وزينات لما تقول:"ياخواتي"..

 وسعاد لما تقول :"مولاتي"..

 وجاهين وحجاب.. 

نجم الاحباب..

 ولأي مؤلف وبيبدع إبداع ف كتاب..  ..

 وعكاشة محفوظ أبو نوبل.. 

والهضبة وحرافيش وسراب..

 و أعشق خيرت واعشق بيرم.. 

عمار ومحمد أبو سويلم.. 

واصرف ع الفن وقول أبذر..

 لوحتي ف جيبي أخر ميلم.. 

واعشق مواويلك عدوية.

. تعجبني وبتسلطن في..

 والله ع العزبي ومواويله.. 

بيقولها وبعديها بهية..

 واعشق قنديل وكمان مدحت.. 

مختار وأديه لما بتنحت..

 ومحمد فوزي أما بيشحت.. 

والله ان قال ماما دي جاية.. 

كلك يافنون دايب فيكي..

 وأصحي عليكي ونايم بيكي.. 

سينما إذاعة.. 

حتي الساعة..

 بطرب لوعملت تيكي تيكي.. 

وفنان من صغري وبتجنن..

 لما تجيني لحظة وأفنن.. 

ف قصيدة وحلوة وجديدة..

 أو أسمع ثومة وأدندن.