ما تحاولش .. للشاعر / عاطف عبد الحميد

ما تحاولش

...... 

ما تحاولش 

تبقى وسط الخلق وش

يرسموك على اى جثه

يغسلوك بالخوف تكش 

يفردوا حزنك بمكواه 

يحسدوك على عيش ومش

.......

ما تحاولش 

تبقى فارس ف البيادق 

او ما بين اموات بطل 

حلمك المزعوم تلاحق 

بين كراميش الخجل 

وانتصارك وهم عايش

واحتضارك سهم طايش

وانكسارك ريش وعش

......

ما تحاولش.

تبقى صادق في المشاعر

وانت قلبك من كاوتش 

الاذين مطاط وواعر 

والبطين م الشوق يكش

و الروافد

..الف وافد م الوريد 

واللى صادر

من شرايينك يقيد

والنتيجه

ف العروق اوهام وغش 

.....

ما تحاولش.

تبقى فوق السطح دش

يظبطوه على اى موجه

و إن قطع إرسال يووش

او يعيد اخبار قديمه 

لو تروح منه الإشاره

او يعيش فى فيلم سيما 

من قمر كسلان يغش

.....

ما تآمنش

للى عمره بيك ما آمن

ولا قلبه ليك مآمن

وانت خطوه نص لكن

عمرك المنحوس يفرفط

موت فوجاؤه مالهوش كش

ما تحاولش

.....

عاطف عبد الحميد