فيه ناس بتتمنّى الغلط
وناس بتبلعلّك زلط
فيه ناس تبعتر وتهين كرامتك
وناس بتلضم فى الشتات اللى انفرط
فيه ناس بتكره اللى يخون
وناس بتضحك ع الدقون
فيه ناس بتضحك ضحكة صفرا
وجوّا القلب أسود غطيس
وناس بحبل الود كافرة
تدوس عليك لتموت فطيس
فيه ناس جميلة خيرها يسرى
زى الدم فى العروق
وناس كلامها سمّ يهرى
من مساخته يتحشر جوّا الحلوق
فيه ناس حيتان ما بيرحموش
من غير أدب ما بيختشوش
أنيابهم تكشّر ع الفقير
وينهشوه زى الوحوش
فيه ناس بتاكل لحمة ضانى
وناس بتاكل فول مدمّس
وناس بترقص ع الأغانى
وناس جنونها السلك لمّس
فيه ناس بتنعم فى القصور
وناس بتسكن فى القبور
فيه ناس بترضى بالقليل
وناس بتسبح فى الغرور
ناس بتغطس فى المراتب
وناس بتفرش ع الرصيف
وناس بتاكل لمّا تشبع
وناس كتير بتنام خفيف
والدنيا عاملة زى غابة
القوى ياكل الضعيف
ليه الناس بقيت ديابة
صدّقونى دا شئ مخيف
******************
رفعت أبوكريّم (شاعر الصعيد)
ليست هناك تعليقات:
إرسال تعليق