الثلاثاء، 21 أغسطس 2018

حرف ورد بين ............. الاستاذه / ميمى عبدالجليل والأستاذ / عونى هشام

 حرف ورد بين

الاستاذه /  ميمى عبدالجليل والأستاذ /عونى هشام 
.........................................................
"بعد اذنكم ممكن أتغر شوية من نفسي"
ومن حقي
ب إني أتغر
مدام الحرف بيطاوع
وف المعني مفيش مانع
يكون لي جميل
وييجي معايا ويلبي
ولا يقاوح
سواء في البرد او
ف الحر
ف من حقي
ب اني اتغر
م داموا اكابر الشعرا
بيهدوني قصايد نور
وبيقولوا
دي صاحبة حرف مش
مكسور
ولا مبتور
وف رحاب الحروف دايما
تلف ..تدور
تجيب الكلمة من بين الهوا الطاير
بريحة ورد ويا زهور
ترسي الحرف لو غرقان
علي شطوط الحنان والبر
ف من حقي
باني اتغر
م دام احساسي دوم صادق
ومش كداب
ولا عايب
ولا بيغتاب
ولا بدخل ف دار غيري
بلا استئذان و اضم كتاب
وبقبل اي لوم وعتاب
ولا بسعي ف يوم للشر
ف من حقي ب اني اتغر
م دام الناس بتهديني
يوماتي
200 سلام طيب
ولما تشوفني مجروحة
بتيجي لجرحي وتطيب
ووقت الشدة يدعولي
ووقت الفرح هنوني
ولما اغيب يومين عنهم
مئات منهم يقولوا
يغيب عليكي الشر
وانا اللي عمري ما بجرح
ولا بتغر
ولكن مرة من نفسي
اقول حقي
سيبوني أتغر !!!!!
#ميمي عبدالجليل
تباٌ لي ..كم أنا متواضعة ههههههههه
صباحكم مغرور بحبي ليكم
============ 
...........عونى هشام
من حقك
ومن حقى
ومن حق
الاصيل يتغر
مادام الحرف
ف ايدينا
ونفضح
كل شئ ما يسر
فمن حقى
اعيش مغرور
ومن حقك
تعيش ف الدور
مادام بينا
هدف واحد
باننا نكشف
المستور
حروفى جايبها
من راسى
وحب بلدنا
دا اساسى
فذكرنى
ولو ناسى
عشان نمشى
سوى ف النور
فمن حقى
اعيش مغرور
عشان الغدر
مش طبعى
ولا عضيت
على صوابعى
وباعرف
زرعى من قلعى
ولا يمكن
اعيش مكسور
بحور الدنيا
عاجبانى
بحور الشعر
لهيانى
نسيتها عشان
ماكون جانى
لاعمرى مشيت
على قافيه
وبالعافيه
الم الدور
لا كنت نسخه
من عارف
ولا طبلت
وانا عارف
ان الرقص
ع السلم
هايبنى قصور
جرحى ماحد
بيشوفه
وحرفى ما حد
بيحوشه
بقول على كيفى
بمزاجى
يرد عليا انا
خوفو
بلاش نبنى
قصور ع الرمل
بلاش نمشى
كمشى النمل
بلاش وبلاش
نفسى ف حل
يخفف عنا
بعض الحمل
قلت كلامى
وبصوتى
كفايه خاصمت
انا سكوتى
لو كان حتى
فيها موتى
هاعلى الصوت
عشان مصرى
انا مغرور
انا مغرور
=====
// عونى هشام

ليست هناك تعليقات:

إرسال تعليق

فن البوستات كمال العطيوى