الدنيا ..... للشاعر / يسرى عثمان

الدنيا زى البحر
صيد السمك غيه
وانتى عيونك سحر
بيحيروا عنيه

يابو البساط سندسى
والرمش متكحل
نيلى على قبرصى
خلى العازول يرحل

اصل النوى ف البلح
قاسى مافيش رحمه
وقلبى لما انجرح
بقى الطريق زحمه

ياجمرى بجناحك
برد هوى المجاريح
زقزق لى بنواحك
حبيبى خطفه الريح

يادنيا هاتى بقى
مش كل يوم تاخدى
كاتبه حياتى شقا
سايقه ليوم لحدى

ياللى معاك الدوا
خليك بعيد عنى
لما الجراح تستوى
قرب كدا منى

مالى طبيب ولادوا
غير بس بوجودك
من يوم ماكنا سوا
ظالمنى بجحودك

عبيت محبه كاس
سقيتك اللى فيه
ظلمت يابن الناس
انت غرامك ايه

مكايده وملاوعه
سيبنى بقى إوعى
تبكى ياعينى ليه
ودمعتى مطاوعه

حابيع قنانى الود
وحاكسر الخلخال
وارمى بواقى الورد
لاخِل والا خال
...........................
للشاعر / يسرى عثمان