إيميل..!
................
على شط الإنترنت..
غوانى الشوق ..ونزلت
شيال يا الموج أسرارى
من غير مجداف ولا سارى
تاخدنى بعيد ..ما تجيبنى
ترمينى هناك وتسيبنى..
للموجه ..تلاوع فيا..
وإيديا ما تلمس ..شط
..على شط الإنترنت...
قابلت ..وشوش ووشوش
بعيون مالهاش..رموش
وملامج وسط المالح..
ف جناين ..توت وموالح
وخطاوى شايله الغربه..
بتصدق ..حتى الكدبه
غرقانه بشوق ومحبه...
من أول كلمة ..دوت!!
...على شط الإنترنت...
أشتوت أشتات..أشتوت
ستات وبنات..ف بيوت
فاتحين صفحات وخطوط
لغرام ..بلطيه لقرموط.!
وهيام ..جنيه لعفروت
وكابوريا ماشيه تتدلع..
عريانه الحلوه بتتمأصع
فى هواها مظلوم الحوت
ومن بعده..لو كان الخط..
...على شط الإنترنت....
ومراكبى يا عيب الشوم..
هربان من عش ..البوم !
حران والدنيا غيوم..
سكران عمال ..يتطوح
لا بيجى ولا بيروح..
بإيدين الهوى ..يتشلح
ويبان ما كان مكتوم..
من هم ..يحل الوسط
...على شط الإنترنت ...
النت ..يا خلق يا هووه
تواه ومعاه ها نتووه..
عفريت ومعفرت ..جدا
إبليس ملعون يتملعن
لو كان الأمر..لابدا !
هاتوا العريان..غطوه
النت يا خلت ..دلال...
حطاط شيال دجال..
متدين وابن حلال!
بيجاوب أى سؤال..
بالصح لو طلبوه....
النت حكايه..وروايه
حدوته ملهاش نهايه
100 مرحب لو كان لهدايه
على بره ..لو كان لغوايه
يا الواعى ما تقول ويايا..
بالكلمه الواضحه والبنط..
فليحيا الإنترنت...
وليسقط واد ..أو بنت
معرفش مقام من بسط!!
...على شط الإنترنت.....
...........................................
للشاعر / ابراهيم القاضي
ليست هناك تعليقات:
إرسال تعليق