دنيا فالصو . للشاعر / عادل الشريف

دنيا فالصو

********** 
1 دنيا بينا وبينها تار
دنيا بوم والصقر طار

دنيا ملعب للصغار
والكبير حطت عليه.

****************

دنيا مولد صاحبه غايب
حبلها مقطوع ودايب

عاطيه للى مايسوى نايب
والسفيه بئا فيها بيه.

***********************

2 دنيا فيها الكدب حلال
دنيا فيها الباشا طبال

ياما هدت ناس ابطال
دنيا قرش ودنيا جنيه.

*****************

دنيا فالصو ودنيا قشره
دنيا خاينه العيش والعشره

دنيا تاخد زيرو من عشره
واللى بناها وقعت عليه .

********************

3 دنيا كل دقيقه فى حال
بتدى للى عايشها شمال

دنيا مش لاقيه الخيال
اللى يركبها ويشكمها.

*****************

دنيا نافشه علينا الريش
صوت وبس وصحه مافيش

دنيا خاينه وماتساويش
زى وجودها زى عدمها .

*********************

4 دنيا عمرها مابتدى
ولا جت معانا فى يوم ودى

قشاش وماشى مابيهدى
واللى فى طريقها ياناس بتدوس.

************************

بتدوس وتهرس بقسيه
ولا جت فى يوم دفعت ديه

واحنا الغلابه اللى ضحيه
تسأل ترد عليك بفلوس .

**********************
للشاعر /  عادل الشريف