أوجاع محبوسة .. للشاعر / رفعت أبوكريّم

{أوجاع محبوسة}(عاميّة)
*********************
يا بلدى ليه كيدانى
وفيكِ الذّل بقى منهــــــج
وفيكِ الظلم بقى عنوان
يألّفوه ويتمنهـــــــج
يا بلدى جرالك ايه
طول الخط كيدانـــــــــــى
قوليلى أنا اعمل ايه
حياتى دوم معاندانــــــى
من كتر الكلام يا ناس
نشف حلقى مع لسانى
عايش أنا تراب مردوم
وصارالفقر عنوانـــــــــى
والله .... أنا بقيت حالّة
وانتِ كتير نسيانـــــــــــى
انتِ نسيتى أنا ولدك
أبيع العمر من أجلـــــــك
ولا نسيتى أنا سندك
نظرة عطف من فضلـــك
ارحمى ضعفى يا بلدى
وخفّى علّى رجلـــــــك
أنا اللى رويت أرضِك
وجرجيرك مع فجلـــــك
يا بلدى ليه هاينانى
وفى عز البرد أدفّيكـــــى
نسيت إسمى وعنوانى
سهرت الليل أحميكـــى
عشت حياتى متمرمط
وسنين العمر أدّيكــــــى
كؤوس الذل هدّتنى
مشفتش يوم هنا فيكــــى
حبات الرمل تشهد لى
يوم كنت أنا ارويكـــى
ونجوم الليل تعهد لى
أغنيلك واسلّيكــــــــــى
لكنّى كرهت الظلم
و كرهت القعاد فيكــــــــى
ويوم ما تقولى فين ولدى
تلاقينى ف رجليكى
أنا ولدك وانا سندك
وانا الضىّ فى عنيــــــكى 
**********************************
للشاعر / رفعت أبوكريّم (شاعر الصعيد)