هموم صارخة .... للشاعر / رفعت أبوكريّم

{هموم صارخة}(عاميّة)
********************
زادت قوى 
ووصلت الحلقوم
ملّيت حياتى
وجافى عيونــــى النوم
أنام وأصحى
على خبر مشئوم
الاسعار تزيد كام ضعف
ما تقولّى يا برهوم
خلّينى أعيش
وانا أمشى زى الإتف
لكن يا حسرة
منين يجيبلك المعدوم
أنا اللى جف ينبوعى
شربت المرّ من كوعى
شدّيت البطن من جوعى
وكل يوم أبات مهموم
أنا اللى بكتب الحواديت
وكمان بحضّر العفاريت
بقيت واحد من السرابيت
أنا بقيت تراب مردوم
أنا واحد من شباب بكره
وملّيت من حيّل ماكره
ليه تخلّينى للبلد أكره
أكره هواها وشجر الدوم
أنا اللى عشقت لترابك
أنا الحارس على بابك
عاصرت جنيهك الورقى
ومسكت ربعك المخروم
أنا اللى وقفت بحدودك
ولا خنت يوم أنا عهودك
أنا روحك ومعبودك
يهون عليكِ أعيش محروم
أنا اللى رويت أراضيكِ
ومسحت الدمع ف عنينكِ
وضربت رقاب أعاديكِ
يهون عليكِ أعيش مهموم
أنا اللى اتحرم ولدى
من هدوم العيد
أطبطب عليه لو يبكى
بإيه الدموع هتفيد
يا بنى كفايه كده
كام مرة نقول ونعيد
أنا اللى بنتى شكت
من قطع فستانها
وأنا اللى بنتى حكت
وقالت لى بلسانها
مش زى البنات يا بوى
تفرح بفستانها ......؟
قطّعتى قلبى خلاص
أنا كرهت الناس
حكومة بدون احساس
عاجبها ظلم الناس
لكن الزمن دوّار
واحنا نموت أحرار
بس الحكومة غبيّة
عايزة حرق النار
بتنقّص فى الماهيه
وتزود فى الأسعار
رب العباد موجود
أصل المنتقم جبّار
*********************************** 
للشاعر /  رفعت أبوكريّم (شاعر الصعيد}