مش عارف ليه !!
------------------------
الوش الباهت في مرايتي
..... انتي سبب فيه
والعمر البايت في بطاقتي
..... مني سرقتيه
تجاعيدي المنحوته ف وشي
والفرحه الحالفه ماتباتشي
والقلب اللي اداكي ماخدشي
وضحكتي عليه
الخوف اللي مصاحب سني
وسلامك البارد ورا مني
وإحساس الغربه اللي ساكني
..... انتي صنعتيه
الشاب العتره المِتغندر في الحاره زمان
والصبح الشربات ومسكر ابو ضحكه جنان
والحلم الوردي اللي انا عشته مع بنت جيران
والطير اللي يوماتي يصبح على شمس سطوحي
والأمل اللي رويته بعمري وكياني وروحي
والضحك من القلب الصافي ويكيد الهم المتعافي
بيعدي ويقولي عوافي مش باين ليه
ترتيبهم حسب إغتيالاتك
وبأمر الأسياد باشاواتك
خدي بعض بواقي كراماتك واللي عملتيه
الشاب العتره المِتغندر بقي ماشي محني بيفكر
لما كسرتيه
والصبح الشربات ومسكّر ويحلّي البحر لو اتعكّر
بقى مُر عليه
والحلم اللي انا عشت أضُمّه طلّعتي تلاته ميتين أمّه لما خنقتيه
خلّيتي اللي مايسوى جنابه بقى حارس واقف على بابه بيبيع في جراحه وعذابه
وبيشتري فيه
والطير الشادي على سطوحي من همي ومن كُتر جروحي بقى أخرس بينادي طموحي
صوته كتمتيه
وجناحه الحيله المستور بقى معدوم حيله ومكسور لما قهرتيه
وبراحة راحتك على مهلك بغباوة أمك وبجهلك قومتي دبحتيه
والأمل اللي رويته بعمري ما طرحش إلا مراري وصبري وخرج من طوعي ومن أمري وجنيتي عليه
وخداني ركوبه وكاريتّا والقلب شرايح في الجتّه
متقطع يجي مليون حتّه ما سمّيتي عليه
وبرغم مرارة الحدوته ومشاعري الثايره المكبوته
أقسملك بالله وبديني وبعمري الباقي ف سنيني
أنا عشقك ساكن تكويني .. مش عارف ليه
القوّال سيوفي
ليست هناك تعليقات:
إرسال تعليق