الخيبة
أول بند كتبته حقيقي
بين أوراق إقرار الذمة
مش خجلان منها وقلقان
ولا مضطر أداري وأخبي
ولا معناها بايظ وفلاتي
ولا معناها إنّ أنا متربّي
ده تعبير صادق ومجازي
لخص عمر حياتي الزمني
مالهاش معنى بديل يساويها
صعب يكون لها حتى مسكن
على ناصية شارع أحلامي
كنت بشوفها كتير في منامي
قاطعة خطوطي وسارقة مراكبي
مهما تحاول أو تتحايل تهرب تجري
بتفتش على ستر عيوبك وتعرّيك
وتسيبك تبكي
حدش فيكم شاف في حياته
خيبة كبيرة بتشبه خيبتي؟
حدش منكم يعرف ستي؟
كانت كل مصيبة تصيبني
أو فرحة وعدت وسابتني
كانت تندب وضعي المخزي
وتمصمص في شفايف حظي
خيبة الناس لها سبت و حد
وإنت لوحدك عندك خيبة
عمري ما شفتها جت على حد
... ـ وحيد علي الجمال ـ ...
ليست هناك تعليقات:
إرسال تعليق