وف ليله سمعت الباب بيدق
والقلب ف صدرى ما بطل دق
وهلال بينادى كأنه بلال
والصوت كان واضح يومها بحق
الصوت بيقول افتح الابواب
انا جاى من بعد سنين وغياب
علشان ما تطمن قلبى عليك
وتطمن عينى على الاحباب
فصحيت من نومى قمت جريت
ع الباب المقفول بالترابيس
ودعيت المولى وقلت ياريت
ما يكنش ده حلم او كوابيس
ولقيت ترابيس ومفاصل الباب
بترحب قبلى بالأحباب
وبتحضن فيه وتبوس ف ايديه
وتقول له وحشنا بعد غياب
وانوار البيت رقصت ع الحيط
والبوص عمال يرقع زغاريط
والقلب ما قاعد م التنطيط
فرحته ملياه مبسوط وسعيد
قربت عليه اتحقق فيه
واحضن ف كتافه وابوس رجليه
واملى العين من نن العين
والشوق كان باين يومها عليه
مشتاق يطمن ع اللى فاتوه
فاكرينه وللا خلاص نسيوه
رضيت من غير لحظة تفكير
معقوله الابن هينسى أبوه
وجريت صحيت كل النايمين
من طير ومواشى وبنى أدمين
وسمعت الحاجه بلهفه تقول
معقوله الليله يزورنا الزين
م الفرح دموعها مطر بيسيل
وتقول بالذمه ده اسمه كلام
من بعدك والله ليلنا طويل
وعيونا يا عبده ما عارفه تنام
شايف طرحك مبسوط ازاى
لما طليت كده يوم ع البيت
طب لحظه يا غالى نجيب الشاى
ونقوم بعديها نزور الغيط
وتشوف القمح يا غالى هناك
تلقاه مشتاق وبيستناك
من يوم ما غيابك عننا طال
وسنابل عمرى بتجرى وراك
على مهلك عاد مش وقت الزاد
اطمن قابله على الاولاد
ازيك يا ابنى يانن العين
وازى حبيبتى الحاجه سعاد
خلفتوا ياواد صبيان وبنات
بتلاقوا الزاد ...بتجوعوا ساعات
م تطمن قلبى يا غالى أمال
وكفايه دموع وكفايه أهات
انا قلت يا أبويا حالنا بخير
ينقصنا يادوب حبة تغير
ونشوف الناس كده زى زمان
بقلوب مفتوحه وليها ضمير
ونشوف الفرح وشجر التوت
طارح ومفرع ع البيوت
من يوم ما غيابك عننا طال
والصوت ف الحلق ده صابه سكوت
قام مد ايديه
والفرح لآلآ جوه عينيه
ومسح ف دموع قلبى الموجوع
ووصى الكل يطوف حواليه
قضينا الليله ف قلب الدار
بين ضحك وجد وحبه هزار
وسمعت انا صوت اجراس الموت
جايه وبتبنى ما بينا جدار
لا عرفت أفوت ولا هو يفوت
ولقيت الفرح ف قلب تابوت
بسأل حصل ايه ولا جرا ايه
فقالولى الناس... كلنا هنموت
************************
رضا أبو الغيط
ليست هناك تعليقات:
إرسال تعليق