المخرج مات
بقلم: وحيد علي الجمال
أنا شاطر جداً في التمثيل .. وبعيش اللحظة بشكل خطير
وملامحي بتمشي مع التغيير .. مش لازم أبذل جهد كبير
وطبيعة دمي أنا زي السيل .. وبحقق أعلى نسب تأثير
وحياتي أنا مسرح له كذا باب .. على هيشة غاب عايش كداب
عندي من الحجة ومن الأسباب .. براهين إقناع تعمل لي كتاب
أنا حاوي قلوب ومعايا جراب .. بفتي ع الفاضي وع المليان
وكلامي بيسحر قلب الجان .. وبشوف الطالع وأقرا الكف
بهري في أوهام وعليكوا بسف .. عايش في الدور ومعايا اسطف
على ذات الدايرة بدور وبلف .. بطلع من دور وأدخل في دورين
وفي ذات اللحظة بكون شخصين .. وطبيعي بعيش صاحب رأيين
ومعايا لسان عكس الاتنين .. واحد بيبان دايماً خجلان
والتاني سليط صاحب سلطان .. مطلوق بيرازي في خلق الله
ولا عنده خشى ولا عنده حياء .. قدام أنا ذاتي بقيت أشلاء
عريان وشايفني على استحياء .. بسترجع نفسي بتوبة نصوح
ببكي من خنقة ضم النوح .. وكأني في طلق خروج الروح
يطلع مخلوق ملهوش زلات .. بيحرم نفسه من الهفوات
تخطفني عيون الكاميرا ساعات .. وياخدني الكادر لجمر النار
يعمل لي ديكور مليان لذات .. والمشهد يرجع زي ما كان
وكأن التعلب عمره ما فات .. ولا شد في ديله سبع لفات
من
بعد رجوعي.. المخرج مات !
ليست هناك تعليقات:
إرسال تعليق