أيام الصبا
=========
لما كنا صغيرين
وكان يدوبك عمرنا
عشر سنين
كنا جيران
في نفس العمارة
الشقة قصاد الشقة
والبابين
على بعض دايما مفتوحين
إنتم هناك
إحنا هنا
نروح شمال
نروح يمين
لبعض كنا قريبين
سمير وميكي
كانوا مجلاتنا المفضلين
نقراها ونبدلها
كل يوم مرتين
كيكة أمي
كانت أحلى كيكة
تعمل كل مرة إثنين
واحدة لينا
والتانية لجيراننا الطيبين
والطبق ما يرجعش فاضي
يرجع شايل بسبوسة
من إيد طنط أم بنيامين
وفي يوم فوجئنا في المدرسة
بقرار من حضرة الناظر
وقف وقال
النهاردة حصة دين
هنا المسلمين
وهنا المسيحيين
...مش فاهمين
قال أصل الشيخ ياسين
حا يقول درس في الدين
أيوة...يعني قصده مين؟
أنا....أروح فين؟
وصاحبي بنيامين
طب إيه الفرق بيننا
هم وحشين
وإحنا كويسين؟
ولا إحنا اللي وحشين؟
ومين له الحق
يحكم ما بين الإثنين؟
يعني كلامهم عيب نسمعه
وكلامنا عيب يسمعوه؟
يا خلق ....هوه
ما إحنا مع بعض
في البيت وفي الشارع
رايحين جايين
لاحد قال إبعدوا
ولا جاب سيرة دين
كل اللي نعرفه
إن إحنا بالحب عايشين
وإن محمد أخو بنيامين
من عشر سنين
ولما محمد إتولد
كان على إيد الدكتور
جورج أبو بنيامين
ما رفضش ينزل
أو قال هاتولي الدكتور حسين
ولما الحريقة قامت
في شقة عم جورج
ماسألتش فين المسلمين
وفين المسيحيين
طفاها إدوار والحاج أمين
يا خلق إحنا بنعبد إله واحد
عاوزينه ليه
يكون إثنين؟
الشاعر الشاعر / محمد عبد القادر
ليست هناك تعليقات:
إرسال تعليق