بقولك ايه
ما تيجي نفضها سيرة
وننهي القصة بالمعروف
ونحمي قلوبنا م الحيرة
ونتكلم على المكشوف
رواية حبك الفاشلة ما تنفعنيش
ضعيفة واقوى ما فيكي طلع من هيش
وانا مقبلش ابيع عمري على ضعفك
ولا اقبل أكونلك الفازة ف رف النيش !
وحتى غرامك الواهن ملوهش جذور
كأنه شهادة ف قضية وكانت زور
أنا بعفيكي من نذرك بكل هدؤ
ومن امتى اللي خان عهده يوفي نذور!
وكل كلام انا سمعته و كان جذّاب
طلع خارج عن المعنى طلع كذّاب
طلع حاجة بتتردد في كل اوان
وليه أنصاره ورموزه وليه أحزاب !
حقيقي الحب م الآخر مهوش ليا
لأني تملي بتعاقب على النيّة
وقلبي اللي اتسفك دمه على ايديكم
ناقص يعني كمان يدفعلكوا الديّة !
سميرمحمود
ليست هناك تعليقات:
إرسال تعليق