الصعود بعرفات
★★★ ★★★ ★★★
وانت بتصعد على عرفات
جبل التوبه والرحمات
وبتدعى لبيك من قلبك
وبتطمع يغفرلك ربك
اياك تنسى ناس بتحبك
كنت واعدهم بالدعوات
وانت بتصعد على عرفات
★★★★ ★★★ ★★★★
ياللى دعاك ربك لبيت
وقصدت الحرمين والبيت
وتركت الدنيا بمفاتنها
وبكل ماتملك ضحيت
لجل مايرضى عليك مولاك
وتحقق املك ومناك
وسط ده كله وانت هناك
اياك تنسى ناس بتحبك
كنت واعدهم بالدعوات
وانت بتصعد على عرفات
★★★★ ★★★★ ★★★★
ياللى لمست الحجر الاسود
وشاهدت منافع وآيات
وطوفت مابين الصفا والمروة
ورميت ابليس بالجمرات
واتوضيت من ميه زمزم
وصليت اروع الصلوات
واستمتعت بكل دقيقة
ما اروعها من لحظات
وسط ده كله وانت هناك
اياك تنسى ناس بتحبك
كنت واعدهم بالدعوات
وانت بتصعد على عرفات
★★★ ★★★★ ★★★
اطيب تمنياتى
السعيد اللفاف
ليست هناك تعليقات:
إرسال تعليق