البت حميده الشغاله
تشبه لدليله المحتاله.
طفشت م الكفر بعمايلها
والكل عارف جرايرها
ولا مره حد يعبرها
ويقولوا في داهيه النشاله
شغاله عند الحاج سليط
عنده ولدين زعيط ومعيط
غاويه آلملاغيه والتنطيط
والحاله ياخال غير الحاله
ساقطه دبلون وعامله سبور
وصباح الخير عندها بنجور
وتقول ده قوامي قوام الحور
تطلق في بخور وتوفي نذور
وياما واد قيما وسيمه
وقع في هواها زي الطور
وسليط عنده حاسب الي
ومربي ولاده وع الغالي
وعنده تويتر ويا الفيس
وعم سليط كسيب فييس
جنيهاته تشخلل جوه الكيس
والبت حميده غاويه النت
ترقص علي لحن غناوي الست
وهواها تبقي بيوم ارتيست
قوم عملت صفحه ع الفيسبوك
ليلها ونهارها بشات بتلوك
وحطت صوره ياحلاوتها
تشبه لبنات التيك تيك توك
وتضيف وخلايق برضه بلوك
وحميده ياخلق بتتعزز
مره بتضحك عشره تبوز
رفضت سعدون رفضت محرز
والست زبيده ام زعيط
تخبط راسها باجدع حيط
ليلها ونهارها شجار ونقار
وحميده تحلف بحياتها
لايوم قعدت علي مرايتها
ولا روج ولا بودره حطيتها
وشغل المطبخ شغلتها
ولا يوم سابت زعيط ومعيط
بتحميهم وتبدرهم ومسك وجاوي تبخرهم
وحمار خدودها ده رباني
والواد مسعود عامل زيطه
ناقص طبله وطرمبيطه
عاوز يخطب بنت الاميرات
ويقول ملبن محشي بشربات
ويجيب العيله واللمه
عاملين هيصه واحلي هلمه
لجل ما يخطب ست الستات
البت الحلوه ام فيونكات
ويقول العمر بسرعه اهو فات
علي باب البيت ينزل تخبيط
من فزعه سهل زعيط ومعيط
وسالهم عم الحاج سليط
قالوا غرضنا الأموره
البت الحلوه السنيوره
وعم سليط شاف الصوره
يحلف ما عنده خلفه بنات
والبت حميده بتتخبي
تظهر حبه وتختفي حبه
كركوبه وعامله ياخال شابه
علي خده لطم الحاج سليط
ويقول مسعود يادي النيله
بنت المركوب نغه الحيله
مقلب وشربته ياخلق الله
بعد ايام حلوه جميله
كلماتي يحيى ابراهيم محمد
الصوره للفنان محسن ابو العزم
ليست هناك تعليقات:
إرسال تعليق