إحْفَظْ اللَّه
لَمَّا بُكْرَه يْهِل يا ابني
إبقَى واعي وكُون جَاهِزْلُه
ما تْسِيبُوش يِنْساك ويمشي
واوعي تِهمِل أو تِغازْلُه
هُوَّ ماشي ف سِكَّة سالْكَة
الِّلي فيها طُوع أوامرُه
دِيمَا مِسْتَعْجِل ودَايس
مش هَيفْضَي عشان تِسَامْرُه
الخَطاوي تبقى واسعة
والدماغ شَغَال وفايق
المسافة مش بعيدة
بَس فيها حَاجَات تِضَايق
وامَّا تِوْصَل... وانتَ تِقْدَر
إبْقَى خُد نَفَسَك وفَكَّر
أصل يامَا خَلْق تاهِت
خَاصَّة مِن قال انا أشْطَر
إتْفَرَم والعَجَلَة دارِت
والشَطَارَة بَقِت نَدامَة
مَدْ إيدُه لناس ما تِسْوی
واتْسَجَن جُوَّا المَلامَة
رَبنَا يْنَوَّر طَرِيقَك
والبيبان تِفْتَح قُصادَك
إحْفَظ اللَّه ف كُل حَاجَة
تِجْني خِير... حَتَّى ف ولادَك
#فهمي_علي
ليست هناك تعليقات:
إرسال تعليق