........ بلاش عناد .........
...................................
أنا لما شوفتك وقتها
لميت ظنوني كلها
وقعدت بيني وبينها اهاتي
عليت أهاتي وحسها
وزاد الوجع حد الأنين
وعرفت إنك بين وبين
وبألف حاله وببالين
مالكيش في أدوار المشاعر
قلبك الصوان دا واعر
والدنيا عندك هات وبس
وناداني صبري وقلي هس
وفتحت باب بالي الطويل
مستني إحساسك يميل
واميل وياكي من تاني
واشوف إحساسي سهاني
والاقيه وداني ع المرسم
وجاب طيفك وألواني
مع إن النفس مكسوره
رسمتك بالحروف صوره
وعشت معاها حلم جميل
وبرغم اللمسه محظوره
عشقت النظره والتفاصيل
وانتي اللي سايقه في العناد
واتقطع بينا الوداد
وانا كنت ليكي المبتدى والمنتهى
فاكره اللقاء اللي انتهى /فجأة
لساه معلم جوا روحي
والذكرى بتقيده
فقلت اروح للودع
يمكن يعيده
حلف يمين الله وقال لأه
ماتلم روحك ياجدع
كات مره واحده
وضاعت الفرصه
ساعتها قلبي اتوجع
وكأنه اتقرص قرصه
وسمعت منك صوت
نزل كما السوط
شق القلب ميت حته
ناهيكي عن الجته
دابت من العته
وانتي ناويه ع البعاد
فقلت لك بلاش عناد
واوصلي حبل الوداد
يوميها قولتي إنك مسافره
قلت لك دا الغربه كافره
فبلاش معافره
وبلاش عناد
واوصلي حبل الوداد
خلي المعادله فيفتي فيفتي
شوري قلبك ويا عقلك
طفي نار الشوق وحيرتي
وهدي سري ويا سرك
كل اللي سافروا قبل منك
في البدايه اتغروا زيك
لما رجعوا من السفر
ماقدرش أقولك
كل يوم قايمين حداد
فبلاش عناد
واوصلي حبل الوداد
إفتحي باب اللقا
واجمعي القلبين بقا
دا الرحله أقصر م الخلاف
طب ليه نخاف
وليه سنينا تضيع عجاف
والحب فيها ينطفي
فنكتفي بشعور قلق
صابه الجفاف
..................................
بقلمي الفلاح الفصيح
معوض حلمي
منشأة بطاش
تمي الأمديد
دقهلية
ليست هناك تعليقات:
إرسال تعليق