حتى السلام انتحر
ــــــــــــــــــــــــــــــــــــــ
وبعدين يا امي
النار فى دمي
عَمًال بتاكل حطب
جسمي النحيل
حتى النخيل ع الشط
شعوطه الدخان
لسوعه
شر الظلام
لمًا السلام
لملم هدومه ورحل
والفجر غاب
وسط الضباب
وانتحر
بدي السلام
لاجلن ننام
لاجلن حياتنا تبتسم
والبسمة ترجع تترسم
فوق الشفايف
انا اصلي خايف
لأني شايف
دنيتنا شاشه مضلمة
والشمس فيها معتمة
حتى النجوم
لبست هدوم لون الفضا
و ايامنا اهي بتنقضى
حبة هموم . حبة شقا
شبعنا ذل ومرمطة
حياتنا كلمة مشخبطة
فوق الورق
عٌمر انسرق
من جيل لجيل
غاوي الرحيل
لدنيا تاني غير هنا
لدنيا تاني حنينه
فيها السلام
فعل وكلام
مش بس كلمة فى الخطب
أو كلمة لازم تنكتب
فوق الورق
وتلف تاني تنشطب
ونسيب لسان الشر ياكل
فى الحياه
أصل الحياه
من غير سلام
زي الحطب
أصل الحياه
من غير سلام
زي الحطب
ــــــــــــــــــــــــــ
عبد الحي فرغلي
ليست هناك تعليقات:
إرسال تعليق