حقك عليا يا ام الغوالى
تبت خلاص وبدارى إنكسارى
=
كسرت قلمى كسر
وعصرت فكرى عصر
وصليت الصلوات قصر
يمكن تتعدل مصر
ويرجع مجدها تانى يلالى
حقك عليا يا ام الغوالى
=
مش قادر أوفى عهودى
بعد م انكسر عودى
والدمع برى خدودى
وحياتى رقم كودى
سامحينى يا أمى إختل مكيالى
حقك عليا يا ام الغوالى
=
لما أجوع هصوم
واضحك وانا مهموم
وادارى الألم والهموم
وهكتم الصوت فى الحلقوم
والمر الصبار عشانك يحلالى
حقك عليا يا ام الغوالى
=
مستقبل مفيش
شغل مفيش
عايشين على العيش
أصل الحرافـيش
متهمشين تهـميـش
يا ويل الغلبان لو بس فى العالى
ووزنت الامور بميزان خيالى
حقك عليا يا ام الغوالى
=
================
الشاعر مصطفى عبد المجيد
ليست هناك تعليقات:
إرسال تعليق