................ فدا دينك ...............
.................................................
وقت الشبع كل الوشوش واحده
الكل راسم ضحكه ع الواحده
وقت العوز بنلاقي رزع وهبد
ونلاقي وقت الجد كل القلوب جاحده
وانت ف غناك من غير ندا .. زحمه
وليمه متظبطه عليها كوم .. لحمه
وقت العوز هيقولوا لحم حمير
ويقولوا راح الضمير وضاعت الرحمه
وقت الرضا إنت الفرح كله
وانت صفصافه وسلسبيل ضله
وقت الزعل بتبقى صهد ونار
بإيديك بتاخد التار والعادي بتذله
وانت ف غناك تلقى الصحاب حواليك
واحد يدادي والتاني حوا ليك
وقت العوز ينفض يوم عيدك
تلقى اللي حوا لك حط الحواية عليك
وقت الغنى تلقى الصحاب المدد
فوقك وتحتك زايدين في جنبك عدد
وقت العوز ينفض مولد سيدك
تلقى اللي باس إيدك يهيلك هدد
وقت العطى محلاك زارع فدادينك
صوت الآدان خلاك سامع ندا دينك
واقف على حدودك حارس صبايا البلد
زارع ضميرك وتد ، وتموت فدا دينك
وقت الغنى حواليك الرقص ع الحبلين
الكل يرمي عليك من الورود حبلين
وقت العزا وحدك واقف بطولك فرد
رموك في حر الشرد ولاردوا حبك لين
.................................................
بقلمي الفلاح الفصيح
معوض حلمي
ليست هناك تعليقات:
إرسال تعليق