مونولوج زوجه رغايه
مراتى لسانها
مالوهش لجام
عمال بطال
بتخر كلام
كان نفسى مره
يجيلها زكام
فى وقت النوم
شغاله شخير
تعبت وصبرى
فاض بكتير
اقول لها بس
كفايه حرام
ترد تقول
اتغطى وانام
مراتى لسانها
مالوهش لجام
وانا اعمل ايه
""""""""""""""""""
شكيت لابوها
واخواتها
وحماتى جت
مره شافتها
اتاريها فوله
وجت نصين
قعدوا اللى اتنين
لوك لوك وكلام
وحكاوى افلام
واغانى انغام
واللحن نشاذ
يخرب بيتها
طهقت خلاص
وزهقت ياناس
فين الاحساس
قربت اكره بس
سيرتها
مش عارف انام
مراتى لسانها
مالوهش لجام
طب اعمل ايه
"""""""""""""""""""
بتحب تفتح
فى المواضيع
وان مسكت حد
تجيبه تقطيع
وبتحكى كلامها
بشكل فظيع
وكأنها ال ايه
شيخ حاره
وعامله البيت
فيه ١٠٠ حاره
دى قريبه
والتانيه دى جاره
مفيش مانع
لو فى سجاره
زهقت خلاص
من نفسى هاضيع
قولوا اعمل ايه
"""""""""""""""
تصحى من نومها
فى النجمه
اخرج
الاقيها تعمل لمه
بجارتها
والخاله والعمه
ده حظى
وجابها فى القسمه
وكمان تتحكم
بالعصمه
طب احل ازاى؟
..................................................
للشاعر / عوني هشام
ليست هناك تعليقات:
إرسال تعليق