{{ رسالة من أعمى }} ..... للشاعر / محمد عباس أبو عمر

 

{{ رسالة من أعمى }}

~~~~~~~~~~~

أعمى العين و قلبي حزين
حتى ملامحي ليها استفهام
ويا الصبر بقالي سنين
بيني و بين الفرح خصام

عايش وحدي في عز الليل
كل الدنيا في عيني ضلام
أي مكان محتاج لدليل
كل حياتي .... من الأحلام

دايما أنا معرفش أتصور
إزاي شكل اللون الأحمر
وللا لون ... الزرع الأخضر
أو لوحة ...... لفنان رسام

ياما حلمت أشوف النور
وأبقى بالنظر مسرور
وليلي يهجر مرة عيوني
وانسى حياة الإستسلام

انا جوايا عالم محدود
وبيني وبين الناس سدود
وعندي أمل ف الله موجود
هو الشافي .. م الأسقام

أنا راضي ..... لكن بتمني
إني أشوف بعيوني الدنيا
واكحل عيني بضي جمالها
ويكون لينا أحلى ختام
.................................
شعر/// محمد عباس أبو عمر