...................
قولى مالِك ... ؟مش دا حالك !!!
لاوية بوزك ع المسا
راحت فين بسمتِك ؟
ما انتِ كنتِ كويّسة
قولى مالِك .... ؟
ليه العواجة ..؟
أنا زعّلتِك ف حاجة؟
قولى يا بنت الحلال
اللى انتِ فيه...
دلع ولا دلال..؟
جاوبى السؤال
ولا أقولّك
خلّيهم يناموا العيال
متدمّعيش
دمعتِك غالية قوى
أنا أصلى عارف
محدّش ينزّل دمعتِك
إلا الشديد القوى
خايف الدمعة تسيل
تبوّظ الميك أب بتاعِك
وخايف بجسمى أميل
يوجعك من حملى دراعِك
متزعليش
قرّبى وكلمة ف ودنِك
وبعد إذنِك
راح أجيبلِك بعضشِى
راح أجيبلِك جوز حمام
تنظفيه وتريّشِى
وتحشيهولى بالفريك
بعد ما آكله أنتشِى
راح أجيبلِك قرع كوسة
أو حتى فلفل يتحشِى
راح أجيبلِك قميص موّرد
البسيه
من غير كسوف لا تختشى
أنا جيت يا روحى .. افتحى
بصّى فى عينى واسرحى
أنا جيت لِك أهوه بسرعة
وبالأمارة
أهو لسّه دافى مطرحى
أيوه .... دلوقتى قولى
لسّه زعلانة ياست ؟
عمرى ما قولتلِك يا بت
عشان انتِ ست بألف ست
بطّلى هئ هئ وتبكى
بعد كل اللى عملته
لسّه زعلانة وتشكى
طاب أقولّك ...
تعالى جنبى ع السرير
واحضنينى
وشمّى مسكى والعبير
وقبّلينى
كل دمعة راح تطير
اوعى تنسى يوم فرحنا
بصّينا ف عيونّا وسرحنا
يومها ركبنا الخيل ورحنا
زىّ الأميرة والأمير
يلا بسرعة هاتى الحمام
وهاتى جنبه كاس عصير
خلينا نعيش يومين سعادة
لو حتى نمنا ع الحصير
...............................................
للشاعر / رفعت أبوكريّم (شاعر الصعيد)
ليست هناك تعليقات:
إرسال تعليق