راجع نفسك ... للشاعرة / ريم صلاح

راجع نفسك
..............
راجع نفسك ..
واقعد لو ساعتين مع قلبك
جايز تلقى حاجات تشفعلي
إمشي بعقلك خطوّه بخطوّه
كل حواري العمر الفايت
وامّا تشوفني استنى شويّه
وانت أكيد ح تحس بروحك
مركب وبتغرق ف دموعك
حط شريط الذكرى قُصادك
لف العجله
ركّز ف الصوره اللي شايفها
خلّي عيونك عدسات زوم
مين البنت ف عز المطره
قاعده ف نُص الليل تستنّى
لمّا لوش الفجر رجوعك ؟

مين ف العالم كُلُّه استحمل
ألوان الأحزان علشانك
واتعوّد على طول هجرانك
إنما وقت ما ترجع تلقى
كل مشاعره بتستناك
تلقى هناك
قلبه وعقله وروحه
ف طوعك ؟
مين من وسط العالم كُلُّه
لمّا تقول الأه بيكونلك
من قبل وجيعتك موجوعك ؟
وامّا الليل العتمه يشدّك
مين بتلاقي ..
كل صوابعه العشره شموعك ؟
راجع نفسك ..
وامّا تلاقي إجابه ح تعرف
حجم الظلم بتاعك ليّا
حجم الأهه النايمه ف قلبي
حجم الحزن البايت فيّا
حجم الفرح اللي زرعتولك
واللي جنيته دموع ف عينيّا
لمّا تلاقي إجابه ح تعرف
إنك كنت ف عيد الأضحى
جزار قاسي
والقلب اللي عشانك ضحّى
كان تحت السكيّنه ضحيّه
راجع نفسك ..
حط شريط الذكرى قُصادك
ساعه بساعه
يوم ورا يوم
شهر بشهر
شوف حجم الأحزان والقهر
شوف ازاي الشهد ف قلبي
إتحوّل من ظلمك مُر
وامّا تحس انك ندمان
إكتب تفاصيل العنوان
أخر حتّه ف أخر زاويه
ف رُكن العمر
قبر ما حد عليه بيمر
هوّ القبر اللي بيإوينى
مُت ولكن حتى ف موتي
لمّا حتيجي ...
ح تلاقي القلب اللي دبحته
فارد إيده
علشان ياخدك بالأحضان
.......................... 
للشاعرة / ريم صلاح