نصيحة أم
فوق ياضنايا وماتسلّمش
مين من وجعه مايتألّمش
بس الدنيا مابتضلّمش
علشان شمسها غابت يوم!
............
خلي اليأس يموت ف عزيمتك
واياك تعلن ليه في هزيمتك
خليك عارف دايما قيمتك
وانسى وقوعك يلا وقوم
.........
هي الدنيا دي حبة وحبة
مرة مرارة ومرة مربى
ومرة رياحها بتكون هابّة
ومرة تشيل م القلب هموم
...........
ومافيش شيء على حاله بيثبت
واعقل واحد فينا بيغلط
مرة بنمشي ومرة بنخبط
وساعات نلقى الشهد سموم!
........
وانت يا حيلتي كتير بتشوف
وان يوم شمسك جالها كسوف
ولا كلامك ناقصه حروف
كله هيمشي ومش هيدوم
.........
صالح نفسك روح و اتأسف
مش هيفيدك لو تتفلسف
واعرف انك اروع واحد
وان الحزن ملوهش لزوم
...........
خليك واثق قوي من ذاتك
حدد وارسم خط حياتك
وان عداك القطر وفاتك
انزل بحر الصعب وعوم
.........
امسك يلا ف ايد العزم
واعرف انك منتاش قزم
وان قرارك محتاج جزم
وان الحلم لازمله رسوم!
سميرمحمود
ليست هناك تعليقات:
إرسال تعليق