مربعات أوقات
أوقات تجر اوقات والدنيا 100 حاله
الثانيه بنت ساعات والحسبه شغاله
ناس تلم الريش وتعجنه فى العيش
ترجع لبيتها تبات ماعاشتش يوم عاله
اوقات كتير راحت والنفس ما ارتاحت
ناس بتنوي الصوم وناس هواها العوم
والعين ياما شافت بانى وفيه فاحت
واللى فضل ساكت جابوا عليه اللوم
اوقات كتير همنا إنا نعض فى بعض
وكتير كمان مننا تفدي التراب والارض
ناس كتير الوان فى مسك فى قطران
وناس بالف لسان ناسيه الحياء و العرض
اوقات اكون مرتاح اوقات اكون غير كدا
السهم يدمي جراح بأنين يرج الفضى
السيف على الظالم فى زمانا ع المعدوم
ودعوة المظلوم جوابها من ربنا
اوقات اكون خايف ما اعرفش ايه السبب
واوقات اكون شايف والرؤيه ليه تتحجب
امشي طريق الزور مش واعي او مغرور
ان فقت اعود مكسور ناقص ربايه وادب
اوقات اشوف الموت اذكر آيات الله
مش كل شده تفوت ولا كل دمعه بآه
الدنيا لاهيانا .... فايته وسايبانا
واللي يقول يانا تزيد الهموم فى هواه
مرات اكون ماشى بخطوه غير خطوتي
ومرات اكون واقف اسأل منين سكتى
لا عرفت اروح أُدام ولا حتى ارجع ورا
والدنيا دى مسخره شايفها يوم دفنتي
اوقات اكون مدفون من قسوة الايام
ومرات اكون ظالم فى حلم او في منام
اصحي معايا كابوس انى فى وحل ادوس
وعشان انا المنحوس ارجع لحلمي وانام
.................................
رد على مبدعى الحرف الجميل
استاذ Magdi Farag Amer
استاذ مصطفي تيسير
ليست هناك تعليقات:
إرسال تعليق