مين كان معاه؟
لحظة خروج آخر نفس ؟؟
لما الحياة سابت إيديه
من غير نجاة من غير فُرص
لما ف رصاص الغدر
نار لسعت حشاه
مين كان معاه؟
مين كان معاه؟
لما الوجع ترجم في صوته ١٠٠٠ آه
لسه ب نَداه
والغدر صابُه بين ضلوعي
رغرغة جِفنُه ساعتها
غَرّقِت عيني و قُلُوعي
على شط خدي
مقتول ياوردي.......... بفعل شوك
دم الربيع.................. بين الشقوق
وضاع معاه عطره وشذاه
كان مين معاه ؟
ساعة إحتضار الحلم
في ضمير الأمل
..لما مات المحتمل
على يد فَرض المستحيل
من فُوهَةِ الموت المُصَوَّب
الى هذا الحلم الجميل
...........اللي كنت نفسي اشوفُه
............مِكحل عيوني بفرحتُه
جَت خارجتُه قبل ليلة دُخلتُه
واهو قلبي طب معاه قتيل
مضروب مكان ما يوجعُه
......إستنوا بس واسمعوا
.........هابوسُه بس وودعُه
وامسح خدودُه من دموعي
..... واغطي عودُه بطرحتي
.....غدروا بزرعي وطرحتي
شهيد مفارق جنتي
طَلْقِ الخَسيس صَاب العريس
والضربة صابت مُهجتي
........الحزن بان على لهجتي
وعقلي تاه من غير خُطاه
كان مين معاه؟
كان مين معاه؟
واخر كلمة قالها إيه ؟
.........................كان طَلبُه إيه ؟
قبل مايسكت كلامه
وف سلامه تنام عينيه
ماقالش يعني ساعتها كلمة
يهزم بها صوت الخَرَس
ولا استيعاب درس الحياة
مَفْهِمش مقصود الحِصَص
الموت آوام ضَرب الجَرَس
......... قبل البداية راح نَداه
......................... مين كان معاه؟
......................... مين كان معاه؟
ليست هناك تعليقات:
إرسال تعليق