مين يديني حنان
بعد حنان أمي
وححس إزاي بأمان
ومين حيشيل همي
مين اللي حيدعيلي
ولما أقوله ف محنة
يجري علي طول ويجيلي
من غير ست الكل
بعدك عشت ف ذل
مشتاق اسمع صوتك
واحشني من يوم موتك
مع إنو ف ودني يرن
والقلب ليه بيحن
من يوم ماسافرتي يامه
وقلبي تعبان بيئن
أنا كنت زي الجن
فرحان دايمن ومزقطط
بجري وبلعب واتنطط
وجودك كانلي سعادة
وفرحة قلبي زيادة
كان حبي ليكي عبادة
روح ربنا يكرمك
يطعمك ما يحرمك
الناشفة ف إيدك خضرا
دعاكي كانلي سترة
بعدك مشفتش خير
من قريب وبعيد
وجودك جنبي يامه
خلا أيامي عيد
واحشاني كتير واحشاني
روحي انتي ووجداني
يا موت يا بو الأحزان
ياللي معادك خان
خواف خطاف خوّان
أخدت مني حياتي
ياريته كان مماتي
حنان كتير حواليا
كله إلا حنانك
الضلمة اهي ف عنيا
ببكي بالدم عشانك
يامه أكيد سامعاني
وأكيد حاسه بأحزاني
لو أعرف إن الموت
حياخدك كده بسكوت
مكنش طلعلي صوت
ولا زعلتك يوم
يامه أنا مهموم
من كل لحظة فارقتك
من كل لحظة عاتبتك
من كل صوت كان عالي
اديكي شايفة حالي
تعاليلي يامه تعالي
وانا أبوس رجليكي
يامه حموت عليكي
فراقك همي وغمي
بعدك مفيش أفراح
بعدك الدنيا جراح
يارب ارحم أمي
يارب اغفر لأمي
هشام سليم
كنج العربي
شاعر الحرافيش
الإسكندرية مصر
ليست هناك تعليقات:
إرسال تعليق