كرابيج حنين
رسمتلى جنة ع الهوا
صدقتها
حلفتلى ح تصون الغرام
صدقتها
واكمن قلبى حبها
عديت دروب المستحيل
وزرعت ف الليل النجوم
أتاريها عاشقة للضباب
وبألف حجة للغياب
تحدف على الإحساس غيوم
وطريقها شوك مليان جراح
بتوزع الليل ع الصباح
وتعيد حسابها ف كل يوم
ع الكل بالاشواق تدور
ماهو قلبها غاوى البحور
وف كل بحر تروح تعوم
كما حية بتبخ السموم
على اللى انكتبله يحبها
من طيبتى يوم صدقتها
ولقيتنى واقع ف الشرك
الفخ من يوم ما تنصب
من قبلى كام عاشق هلك
والدور عليا عشقتها
ف وقعت ف البير الغويط
وما كنتش اعرف قد إيه
جواها م الأسرار محيط
كان قلبى ف الأشواق عبيط
صب الغرام زى المطر
على أرض بور
كان أملى يبقى غرامها سور
أسند عليه باقى الحياة
واتغطى بالحلم الجميل
أتارينى جيت للمستحيل
وشربت من كاس الهوان
جرعة مرار
الحب زيف والجنة نار
ومابين دروب الانكسار
والانهيار
لسانى واقف بين بينين
فى شمالى ألف طريق وجع
وعذاب على إيدى اليمين
ونهار ما أعلنت انسحاب
حسيت بدق القلب صار
كرابيج .. حنين
الشاعر / محمد أبو العبادي
ليست هناك تعليقات:
إرسال تعليق