وآآهين
ع العمر الطالع بره الصف
والحلم الساكن اخر رف
والحزن الخاطف فرحنا خطف
والقصة البادية بنهاية!
وآآهين
على كل حبيب مطلعش حبيب
على كل حمّل اتحول ديب!
على شمس ف عز نهارنا تغيب
على عيب واتصنّف لمزايا
وآآهين
على فُرقة بتاخد منا الروح
على غدر يزود اي جروح
على جرح بقاله سنين مفتوح
على صورة اتحبست ف مراية
وآآهين
من ليل مايجيش من بعده نهار
من كل مكان بيشيل اسرار
من أي غياب ملهوش اعذار
من مدح اتحول لوشاية!
وآآهين
من أي وداع محناش قده
من كل بيبان لينا اتردوا
من ناس بدموعنا بيتوضوا
ويداروا الغل بضحكاية
وآآهين
من بكره الرافض مايجيش
من حلم اتحجّم في أفيش
بيموت والظاهر بيعيش
ولموته بيرفع 100 راية
وآآهين
م الامل الميت في مخاض
ومشاعر رخصت في مزاد
ورحيل من غير الاغراض
وجنين مولود من غير داية!
ليست هناك تعليقات:
إرسال تعليق