مِنْ عِطْرِ راء
النص دا مش شعر
ولا فيه صور وبحور ، ولا وزن ولا قافية
النص دا طالع من روحي وطالع بالعافية
.....
هل محتمل ؟
إن المطر يروي الصحاري القاحلة
من بعد سبع سنين عجاف !!
ربك خلق لينا الأمل
فـازاي نخاف؟
..
سبع سنين مَرّت
ولا سهم راشق في الضلوع
كان فيه خضوع أو شيء شبيه للإنكسار
من صُلبي صبّيتِي
ليه تُهتِ عن بيتي
صَبُّوا اللي كانوا السبب ...
فوقي المرار بالكوم
اتنين من صلب ابوهم ف الرحم
واحد ماعجبوش الحياه رحل
والتاني كافح لجل يطلع للنهار
وياريت ما كان في يوم طلع
ولا شق إيده ف المشيمة بكبرياء
شقشق سطع
كان ليه يكون لسنيني داء
كل المشاهد شاهدة ...
إنه مالوهش ذنوب
كل أمّا أفكرأتوب
من ذنب مش ذنبي
صابر كما أيوب
فارحمني ياربي
الذنب كان ع الأغبياء
شفت الجنين بعيوني فاستسلمت
قلبي انحنى ، كنتي لي انا ، من صلبي انا
" فـَ ظهرتي بنت "
ملامحها تشبهني
لكن وانا صغير
نزلت دموعي في شكل آه
آآه يا مغيث شكل الحياه اتغيّر
البعد عنِّك كله خوف
شَكّل حروف شَكِّلت إسمك
جوّا قلبي أربع حروف
بدايتها كانت حرف راء
ونهايته كانت مش باشوفك
وده كان بلاء ظاهر في خوفك
وأديني شفتك من بعيد
إيه الجديد قسمة وقدر
قلبي اللي كان أصبح حديد
للمرة مليون انكسر
شبه الملاك صارت حجر
محتاجه حضن يضمها
مش إيد بتغرس شرها جوّا الوريد
الحلوة عود شجر الرَنَد
… ريحها الذكي
فواح لدرجه ما تتوصف
… زارها المرض
صارت ك دُمْية مع الأسف
… صابها التلف
الخلق منها بقت تخاف
مرت عليها سنين عجاف
قلب الصبيه داب وشاخ
مع إنها لساها بنت صغيرة
بنوته لسه لابسه تاج
صدقني يا نبض إحتياج
إن المرض مشي سكة فيا
صدقني عجزي ف العلاج
شرخ ف روحك ياالنقية
وانا ....
أنا حزني ف قلبي حزام ناسف
أيوه أنا آسف..
آسف كان لازم أحميكي
لو حتى جزائي انا كان حرمان
بكره الأيام هتَورّيكي
من صانك يومها ومين كان خان
هيبان قدامك.مين ظالم
أو مين مظلوم
ف شريط الذكرى المتعادة
هتلاقي حقايق مخفية
حددي بذكائك كالعادة
… مين المظلوم
هتلاقي المظلوم إحساسك
والظالم خاين بين ناسك
آسف جداً
كان نفسي أحقق أحلامك
…وأختار لك أهل
بالله مش سهل اللي باقوله
أنا بابكي عليك عمر بطوله
والناس بتطبطب علي كتفي
… بتقول معلش
معلش كتير أنا باسمعها
طب هل معلش ترجعها؟
أو تسمح ليا بنظرة عين!
أنا قلبي حزين ..
أو يمكن شرخه يسد الدين
لو ف الإمكان ..
هجرك يشبه هجر الأوطان
أربع سنوات مافيهمش حنان
رمضان بييجي وإنتي مش هنا
أربع سنوات غاب منها أمان
والعيد زعلان ..
طب قولي يارب
الحل دا فين ..
صبر السنين دا مكانش سهل
أنا حقي إن تكون لي أهل
مش طيف بيسري ف حلم نومي
أو صوره باهته مابين هدومي
أنا حقي هي ..
مش مسرحيه بتتعرض قدام بشر
أنا حقي حضن ..
أو نظرة منها تلم قلبي اللي إنكسر
أنا حقي حضن ..
أو لمسه منها تداوي ضعفي
أنا حقي حضن ..
جوايا نار بتمص عطفي بقيت شيطان
القسوة سادت والحنان مني إتنزع
شفت البدع ..
لاجل إن أكون صورة ف خيالها ماتتمحي
ف يارب جبر
زودني صبر
يزيدني صبر
أقول له صبري خلاص خلص
دي سنين يا عمري ما خدت منك حضن
دي سنين وكاتم وجعي جوايا
بعدك سمايا إتكحلت ب الحُزن
والله هانت أوي وتنوري سمايا
وساعتها يمكن نتخلق بالحضن
ليست هناك تعليقات:
إرسال تعليق