الموقف
،،،،،،،،،،،،،
يا سيدنا الشيخ يا كباره
يا بركة ناسنا ف الحارة
يا نور على نور وبجدارة
ف رؤية من رؤى الأحلام
وقبل الفجر شفت منام
ضجيج من غير صراخ وكلام
خلايق واقفة محتارة
طيور فوق الرؤس بطير
وموقف كله صعب خطير
لناس صالحة كلامها خرير
وناس ف الدنيا جبارة
وشفتك لاضم الحسنات
ف خيط وكأنها النجمات
دموعك غرقت طرقات
فى ايدك أوس وسنارة
سألتك هي دي الجنة ؟
وليه الناس هنا لمة ؟
لا عارفين خالة من عمة
ولا زوجة ولا جارة
ونار الشمس فوق الروس
وخيط ممدود كحد الموس
وناس ماشية عليه بتدوس
وناس طايرة كطيارة
وابويا هناك فى صف بعيد
وكل الناس فى كرب شديد
عرقهم يملا بير و يزيد
ما فيش حركة ولا اشارة
وحيرني فراق الاب لولاده
وكانوا اغلى من عمره وأمجاده
نسيهم هم والزوجة واحفاده
ما فيش احساس ولا حرارة
صحف طايرة كما البلالين
تاخدها الناس شمال ويمين
حسب عملك وصدق الدين
ونظرات كلها مرارة
وكان عشمي اشوف أمي
واشكلها مرار همي
قالتلي جمعي ولمي
من الحسنات أوام همي
يا بنتي الدنيا غدارة
سألتك قلتلي دا حساب
وكل الناس معاها كتاب
يا نار او جنة فيها شباب
وحور العين تاخد للباب
وولدان وزعوا الاكواب
لا واسطة تفيد ولا شطارة
بقلمي
ناهد الموجي
شاعرة مصرية
ليست هناك تعليقات:
إرسال تعليق