ف الوقت الراهن هنراهن. علي وعي الناس
سلفني كمامتك يا شقيقي لفة و خلاص
مليت م الحبسة و مراتي و سمكرة الباب
وحشاني القهوة و الشيشة. و لمة لاصحاب
خليها علي الله و بالبركة و ربك ستار
و كورونا ازاي هتموتنا. فستك وهزار
المخ المصري الفرعوني. بيلاقي خلاص
ف الوقت الراهن هنراهن. علي وعي الناس
ف الوقت الراهن عدينا. المية مليون
حانوتي بلدنا هنجامله. ونربي زبون
بالمرة نخلص م الزحمة والعين و النق
بنموت ف اللمة وبنسلم. بالايد و البق
معقولة تشوفني تطنشني. ولا فيش احضان
خش ف لحمك يا واحشني . دا الحضن حنان
المخ المصري الفرعوني. بيلاقي خلاص
ف الوقت الراهن هنراهن. علي وعي الناس
تجار الازمة ولاد بمبة الطاق ليه اتنين
هجيب اللقمة وكمامة. طب قولي منين
قافل الدكانة مش لاقي. ف بيتي صابون
يا ريتني موظف بالدولة. وراتب مضمون
وفرلي أكلي و علاجي. هقعد ف البيت
هروحلك ليه ولا هاجي. غاوي تنطيط
ساعتها راهن ميت مرة. انت الكسبان
راعيني قيراط صدقني. تكسب فدان
المخ المصري الفرعوني. بيلاقي خلاص
ف الوقت الراهن هنراهن. علي وعي الناس
للشاعر الغنائى
إبراهيم دعبس
ليست هناك تعليقات:
إرسال تعليق