رباعيات الأيام
الجزء الأول
(١)
يوم مملوك ويوم مالِك
ويوم مكتوم ويوم سالِك
دوام الحال مهوش ممكن
نهار أبيض و ليل حالِك
(٢)
يوم البال يكون رايق
ويوم مخنوق ومش فايق
ساعات بيحب كل الناس
وساعات للكل مش طايق
(٣)
وف يوم الود منا يطل
نلاقى العيشة ورد وفل
وساعات الحقد يملانا
يخلى يومنا غِل ف غِل
(٤)
يوم نفلح نصلى الفَجر
ويوم نشطح نروح للفُجر
ومين يقدر نساوى اتنين
عين العقل ويا السُكر
(٥)
يوم داين ويوم مديون
ويوم باين ويوم مدفون
ويوم مولود عليك شاهد
وليك يارب فينا شئون
(٦)
يوم عاقل ويوم مجنون
يوم ساجن ويوم مسجون
وكل شئ ومكتوب لك
ومتقدر بكن فيكون
(٧)
يوم ضحكة وعين لامعة
ويوم آهة وعين دامعة
وانا الباكى وانا الضاحك
ف يوم فُرقة ويوم جُمعة
(٨)
يوم راضى ويوم شاكى
ويوم ضاحك ويوم باكى
ويوم مش لاقي لقمة عيش
ويوم ياكل فى كنتاكى
ليست هناك تعليقات:
إرسال تعليق