حتى الزمان اشتكى
قالوا الزمان ... راح الزمان سابنا
جينا ف حاضرنا ما عرفنا إيه نابنا
كترت معاصينا وزادت الاحمال
وما حد قال توبه.. قولنا وراه توبنا
ليه كل حاجه نقول سببها زمان
دى الكفه عوجه عوجت الميزان
ليه يابن آدم راح فين الانسان
لكن الفساد عشش مع قلوبنا
كنا زمان الأصل جنبه تاريخ
خلطو الزمان قلبوا الفسيخ بطيخ
غيرنا عليِ وصعدوا للمريخ
غابت العقول والبلطجى سيدنا
قنوات كتير فى الفضا فاضيه
هجص ورقص صابونا بالقاضيه
حتى القانون مش لاقي بينا مكان
سب وقذف والشتمه تحكمنا
عيبنا الزمان والعيب بأفعالنا
القتل ع المكشوف شوفوا إيه مالنا
اتغير عيالنا واحنا رايحين فين
ولمين اقول شكوتي والكل قال مالنا
قالو ف الأمثال فى الزير تبان ميته
وقالوا ع الخلخال.. الاصلى مع رنته
وقالوا فيك يا زمان كل العبر وياك
واحنا بايدينا هلاك الحق أو دفنته
عوني هشام
ليست هناك تعليقات:
إرسال تعليق