كلامكم حلو ومسكر كلام ع الكيف
ضحكتوا علينا وطلعتوا مجرد طيف
فمش معنى اننا رضينا بأشكالكم
هتاخدوا الروح وتدونا مشاعر زيف
.........
شربنا عشانكم العلقم وكان غلطة
لحد ماماتت الرغبة بكام جلطة
وقلنا مافيش قلوب غيركم هتفهمنا
طلعنا ودان و عشمانة ف آدان مالطة
.......
قانون الدنيا يوم تاخدوا ويوم تدوا
وانتوا قانونكوا ع الاحساس بتتعدوا
وكل مانيجي ف ضعفكوا نقوّي
ف وقت الضعف فوق آشلاءنا بتعدوا
........
ماتستاهلوش ولا حتى المرور ع البال
ولا ينفع كمان نمسك معاكوا حبال
ماياما القلب وراكم من الرقة
وانتوا قلوبكم السودة حجر ف جبال
........
عملنا معاكم الحلوة ومافيش تقدير
وانتوا اساتذة ف خداعكم وف التخدير
مفيش قصة سنين عاشت على التمثيل
ولا درس الهوى يوصل بدون تحضير
........
سنين ع القلب نتحايل عشان يرضى
وندي جديد فناخد منكم الخردة
وكل مانيجي ونقرب يادوب سنتي
نلاقي بعادكوا بالكيلو وكام ياردة
..........
خلاص القلب كان نايم وحس وفاق
وطعم غرامكم الفاشل ملوهش مداق
انا عشت السنين بينكم بداويكم
وانتوا بليتوا أفكاري بأكبر داء
ليست هناك تعليقات:
إرسال تعليق