همس الحروف
عقدت العزم والنيه
انقى من الحروف ميه
بإحساسي . وإيماني
تكون تسبيح وادعيه
ها نسج خط فى الاحلام
واطهر توبى قبل ما انام
اداوى جرحى م الآلام
بهمس الروح فى أمنيه
حروفي نبع افكاري
وقلمى مسكنه فى داري
اوصل ليلي بنهارى
واكتب شعر عاميه
يقول الدنيا إيه مالها
ايه غير فى احوالها
وليه بتزيد فى اوجاعها
بحمل كبير ماهوش ليه
وانا صابر وحرفي حزين
قلمى زرعته جوه الطين
وكراسي بقاله يومين
تاه مني ومالوش ديه
كتبت حروفي ع الرمله
بغلطات ياما فى الاملا
جانى فى المنام نمله
تواسينى ... تشد فى ايديا
اقول شاعر تقول لأه
اقول كاتب عايز زقه
وحتى اديبنا عاش خانقه
بضماير فينا منسيه
يعدى الليل ومش داري
بعدت كتير بأفكارى
مين بايع ومين شاري
وزكايب الهم مرميه
بنقرا كلام مالوش معنى
فى طبل ورقص مع مغنى
مين فاضي ليسمعنا
ويوصف حل لقضيه
قضايانا بقالها كتير
وشبابنا ناقر ونقير
امتى نحس بالتغيير
دا دمعى زاد عمى عنيه
انا شيبه وحياتى وحيد
حبايبي راحوا عنى بعيد
الامى كل يوم بتزيد
ماحد فى يوم رأف بيه
معايا حرف ملازمني
وقلمي فى الميراث لابنى
وافكاري تعذبنى مع الوحده
اقول شاعر يرد خيالى بالنيه
ونسيت انا مين ؟؟؟
============
عوني هشام
ليست هناك تعليقات:
إرسال تعليق