إللى قال الدنيا غابه
حد يائس م الصحاب
شاف وقابل ناس ديابه
ظن فيهم ظن خاب
حد كان مغرم صبابه
حبه راح أصبح ضباب
منطوى عايش كآبه
لما حتى شبابه شاب
حد مستسلم تملى
بإيده اختار العذاب
حد عاجز ع المواجهه
حد قافل ألف باب
حد داخل شرنقه
عمره ضاع ويا السراب
فوق ياصاحبى وحط فاصل
ولا حتى إبنى سور
بين اللى عدى واللى حاصل
دى مدرسة و العلم نور
عيشها وإتعلم و واصل
من مواقف ع السطور
والسطور أيام حياتك
فى كتاب خليك جسور
والقلم يكتب ألم
يكتب فرح يكتب سرور
إوعى تحس بالندم
بعد الألم للفرح دور
إرفع راسك عيش علم
و إوعى يخدك يوم غرور
________
منال النبوى
ليست هناك تعليقات:
إرسال تعليق