اللهم المدد
وجرس بيرن... خلاص ماشيين
فاكرينها ايام.. واتاريها سنين
شاطرين ف العد وما بننساش
وبنحسب ألف حساب... واعيين
أخدتنا الدنيا وروحنا بعيد
بين فرح وجرح وخوف وأنين
عدينا بحور وسافرنا بلاد
وعرفنا بشر بخصال تانين
على غفلة ميعاد الرحلة خلاص
وميعاد العودة ظهر للعين
مخزون أعمالنا مفهش كتير
الزاد معدوم هنجيبه منين
الوقت اهو فات واحنا كأموات
جمعنا فتات علشان تافهين
يا إله الكون يا رحيم وغفور
إلهمنا مدد حسنات بتدور
أجبر أرواح بتمد الإيد
خايفة من اللحظة وم المواعيد
يا إله الكون يا ودود يا عظيم
مدلنا شعاع م النور يا كريم
إهدينا طريق مافيهوش أوزار
عدينا على سراطك طايرين
إحنا المساكين
خايفين م النار
أوصلنا بحبل لصاحب الغار
اللهم صل وسلم وبارك عليه
م . فهمي علي نصر
اللهم آمين. وصلى اللهم على سيدنا محمد وعلى آله وصحبه أجمعين.. بارك الله فيكم
ردحذف