هروب
ولقيتنى بهرب م الحقيقة للخيال
والدنيا حلوة وحر نفسى
مفيش عيال
ولا زوجة تسأل كنت فين
وعملت إيه
وكل ليلة اروح لحفلة وكرنفال
وانام براحتى واقوم براحتى بدون قلق
واطلق سراح القلب اللى م الهم أتخنق
وادخل جزيرة العشق من باب الحنين
واهدى الصبايا دى الغويشة ودى الحلق
وأبنيلى قصر من الدهب وجنبه كوخ
للذكريات المؤلمة ف قلب النافوخ
وكل فترة افتح بيبانه وافتكر
أضحك واكركر بالقوى وممكن ادوخ
وأكتب قصايدى كلها من غير دموع
وحنسى دايما كسرتى وقت الرجوع
وحا اعيش حياتى كلها من غير ضلام
لا احتاج لشمس ولا قمر ولا ضوء شموع
يا راجل أصحى وشوف يا اخويا اللى احنا فيه
قوم شوف بناتك عملوا ايه بيتخانقوا ليه
حرام يا عالم أنتوا مالكوا جرالكوا أيه
دى ريهام يا بابا خلصتلى النسكافيه!!!!!!!!؟
ليست هناك تعليقات:
إرسال تعليق