أحاول أنام
أحاول انام بدون هيصه بدون أحلام
أحاول انام بدون الآه أو رشفة زكام
أحاول انام على الرايق من غير كلام
أحاول انام بدون هري وشغل الأفلام
احاول أنام ع الهادي لو بحضن الغرام
أحاول أنام بلا ماضي بدون إستفهام
أحاول انام أنا نفسي أروح جوا المنام
أحاول انام على ذكر الله وكلي إبتسام
أحاول أنام من تعبي فيتعب مع الهيام
احاول انام ياعايدة و بلاش كتر الملام
أحاول انام من شبرا لحي سيدي الأمام
أحاول أنام بإذن الله لو بحضن الزحام
أحاول أنام بأجازة مهدية غلبها الحطام
أحاول أنام اخاف تعاتبني بنومي الأيام
أحاول انام علشان اهرب بإدمان المدام
أحاول انام لأسافر بدون فيزا بلاأختام
أحاول أنام على حدود الحق وبلا أرتام
أحاول أنام والباطل صاحي اكل الأيتام
أحاول أنام بدون اي منوم بدون برشام
أحاول انام أنا صوتي مكتوم مش تمام
أحاول أنام بأدب و ملتزم باوامر النظام
أحاول انام علشان الماتش الساعة كام
أحاول أنام قلبي اتملى من العالم أورام
أحاول أنام بالغابه بالبحر أو فوق الغيام
أحاول أنام لأن العالم ذئابه تحكم أغنام
أحاول أنام خايف على ولدي و الأرحام
أزاي أنام لتقوم القيامه وأنا جوايا عريان
أزاي أنام من غير حسنة ولا جابر للغلبان
ازاي انام العالم اللي بيتحكم فيه ثعبان
أزاي أنام وإنا فاشل والإنسان هو التعبان
أزاي انام لا عمل ولا خبز ولا حتى إسكان
أزاي انام والعمر راكب قطر سكتة توهان
ازاي انام العيد دايس مع إنه بقلب إنسان
أزاي انام لا بسد جوع أو حتى برد حرمان
ازاي انام عطشان و المروى ما تروي ظمأن
ازاي انام والشعارات بإيدينا تملى الجدران
ازاي أنام مقفول بقلوبنا طاقة النور لليبان
ازاي أنام واحنا عرايس و الفرجه بالمجان
أزاي أنام القاتل فينا له الف حجة و برهان
أزاي أنام دا القصاص شرع العدل بالأديان
ازاي أنام و المقتول لحمه مشاع لكل جبان
أزاي أنام والبحر جف من الميه ولا له شطأن
أزاي أنام من ظلمه لحاله والحق ماله مكان
أزاي أنام زرع البهتان الحنظل زهر البستان
أزاي أنام وأنا همومي قفل بابي و لا سجان
أحاول انام اخد منوم او حتى علبة برشام
أحاول أنام بدون واسطه لربك دايما علام
أحاول أنام وأنسى طموحي كلي إستسلام
أحاول انام النوم مخاصم عيني بالله حرام
احاول انام من قدري دا محاصرني بإحكام
أحاول أنام من نفسي واحكم أمرها بزمام
احاول انام بالتوبة ورضا ربي لنفسي إلزام
أحاول أنام كذا توبه ولا يهنى لعيني منام
الشاعر/ إبراهيم شبل
ليست هناك تعليقات:
إرسال تعليق