سجال عالى المزاج
بين الشاعر/ عونى هشام
والشاعرة / منال النبوى
........هو
شى ... حا .. هِس
كرباج ورا ياسطى وبص
هتلاقى صبيه عفيه
وبترقص واحده ونص
قتلتنى ونظرتها خبيثه
خلتنى اخس النص
...........هى
انا مستنيه تهل عليا
بدور حنيه وفيه ملاغيه
تقول يا صبيه وحشتينى
و أرد الباب وارميك بعتاب
فين قلبك غاب راح سابنى وساب
ونسانى بشوقى وحنينى
.......هو
مش عارف فين شوفتك مره
كان شبهك صورة فى محطه
او كان على باب سجن عمومى
مسكوكى بالسرقه ياقطه
انا شفتك ومعاكى الشيشه
ودخان طالع شكل الكور
اتاريه معسل بحشيشه
وانا كنت بقول انه بخور
..........هى
انا شوفتك يمكن فى نيابه
او شوفتك فى المركز مره
بيقولوا عليك رجل الغابه
وخطير إنك تفضل بره
........هو
خد نفس وحاسب ..حاسب
طب حاسب بقى ع المشاريب
مسطول فى الخطوه ما تحاسب
مره تصيب وانت رح تخيب
..........هى
هات لنا حجرين مع تعميره
خلينا نتوه او ننسى الغم
نفسين شوفتك ناس وكتيره
وجريت على بيتى وقولت أتلم
.........هو
نفسين شفتك .. فى الصورة اتنين
وكمان اتنين ماشيين وياك
الخطوه وراك كانت مترين
ومركب اتنين عين .. فى قفاك
.........هى
فى الشيشه حشيشه ومطبوخه
بإدين طباخ عالى القيمه
طيرلى دماغى من الدوخه
بتحبيشته الاصلى يا عظيمه
...........هو
مسطول وهوايا جابنى عليك
مسكت ايديك شفت حياتى
يا حرامى اسم الله عليك
وبتقول انك شغال حاتى
........هى
ولع فحمايه وتبقى حكايه
والسهره تفضل صباحى
وتقولى تعالى مزاجى انا عالى
ع القهوه بتاع عمك ضاحى
........هو
تعالى فيه غرزة ورانا
نضرب كيس بودره على الماشى
وتباتى..... الليله ديا حدانا
وتقول ان الليل دا .. ماجاشى
يا نجاشى منك يانجاشى
كل دا كان منك ياخراشى
اتاريكى معلمه فى البودره
واحنا جيران برضه ماندراشى
ياخراشى
..........هى
انا لفه سجاره و جوه الحاره
ومش عارفه أوصل على دارى
عامله اماره و حطه شيكاره
فيها قالبين طوب نوعه حرارى
حصلت عاركه و قامت غاره
سرقوا الشيكاره يا مرارى
وهروح ازاى وانا واد نساي
داحشيش اصلى آه يانارى
البودره دى كيف
وانا واد كييف
فى الشم تملى
بكون حريف
ولطيف وظريف
وبشكل مخيف
واسيب حقى
فى غموس ورغيف
ولا يمكن اسيب حقى ف شمه
هاتى غويشتين بيعى الخاتمين
إعطينى فلوس والنبى يامه
..........هو
انا خايف استنى اروح فيها
ما كفايه الشيشه يا حياتى
المكس هايقلب يعميها
خايف ليكون فيها مماتى
اصل انا كييف اه على ادى
عجلاتى لقيت نفسى .. لساعاتى
هههههههههه
..........هى
دخانك طار على بلكونتى
وانا نايمه وبسمع الحانك
سطلنى اه يانا ياحوستى
لا أتعود و أدمن دخانك
.......هو
يا معلمه يا معلمه
تلميذ وجى المدرسه
نفسين حشيش كدا ع السريع
مع حبتين م الهلوسه
بكتب معاكى ومش دارى
ولا حتى لاقى افكارى
اخدت من ايدك حجرين
تهت ف شارعنا نسيت دارى
...........هى
ادينى حبايه وكاسة شاي
واظبطلى الطاسه الخربانه
سمعنى ياشاعر قول ع الناى
انا شمه فى القاعده خيانه
بعد الحبايه بقيت اذاى
بهرش فى دماى الجربانه
قاطع بمقاس بميزان حساس
وكأنه بيقطع من جلده
إيه يابن الناس خلتنى أحتاس
دا حشيشك فرفشنا يا عبده
..........هو
ملكيش حل وفكينى
شربت حشيش وياكى بمزاج
صورتك قلبت مع عينى
صيصان فى لحظه لقيتها دجاج
معرفش فين هاتودينى
فى شبر ميه لقيته لجاج
مسكت حجره من الشارع
وقلت ان دى قرن من العاج
عملتى ايه ما ترسينى
حاسس بانى جوه سياج
انا كنت ميكانيكى بريمو
فى لحظه قلبت لحلاج( حلاق)
.......هى
رص الحجرين شد النفسين
متع نفسك يلا ياعوضين
بيع القراطين جر الفدادين
هاتسيبها لمين وتروح ياحزين
ماتعيشها يومين رص الحجرين
الواد محرس شيفاه محروس
وبيجرى وطالع م الحاره
فجريت وياها ولمحت معاه
فرشين مع بفره وسيجاره
وانا واد كييف وبحب الكيف
فجريت وياه خدنى عماره
وفتحنا الباب شوفنا الاحباب
جاهزين بالشيشه الجباره
.............هو
الواد محروس ده واد خلبوص
ماشى فى الحاره بزماره
الشيشه معاه وحشيش فى هواه
والبودرة مخبيها فى سيجاره
المكس كتير صعب التقدير
ويقول انا طالع بخساره
اتاريه عفريت وتملى حويط
ومخبى العده فى شيكاره
وتشوفه تقول اهبل وعبيط
يخلص رح يختفى فى مغارة
الواد محروس
تمنياتنا بقضاء وقت جميل ودعوه
لمحاربة المخدرات بكل انواعها
عونى هشام _ منال النبوى
ليست هناك تعليقات:
إرسال تعليق