الأولة: يارب
التانِيَة: ياقلب
التالِتَة: يابلد
الأولة: يارب ع الشقا قوينا
التانية: ياقلب زود الخير فينا
التالتة: يابلد ماتنسيش اسامينا
الأولة :يارب ع الشقا قوينا بالصحة والعافية
التانية: ياقلب زود الخير فينا والنفوس صافية
التالتة: يابلد ماتنسيش اسامينا لو حتي مش شايفة
الاولة: يارب ع الشقا قوينا بالصحة والعافية وبالحلال والدين
التانية: ياقلب زود الخير فينا والنفوس صافية نفوس الطيبين
التالتة:يابلد ماتنسيش اسامينا لو حتي مش شايفة وعاملة الودان من طين
اللحن دا لغنوة شقا
على وتر العرق معزوف
بات الرضا في الحشا
صبح الندى مكسوف
عزمنا الهنا ع العشا
كلنا عليها ضيوف
فَرَح الضمير إنتشى
ولا همه أي ظروف
الحلم رفرف رفا
سقف حدوده الفضا
والسيرة لو فضفضة
ف إبن الحلال معروف
ليست هناك تعليقات:
إرسال تعليق