(طالع ع المعاش)
فضل الربيع واقف مجاش
والعمر طالع ع المعاش
اصعب شعور لماتحس
ان السنين راحت بلاش
لما تلاقي الشعر شاب
واجمد مافيك لخلخ و ساب
لما تحس انك وحيد
موجود ولكن ف اغتراب
لما تحس انك ضعيف
وانك بقيت ف الدنيا ضيف
وتحس انك شيء تقيل
مش راح تأثر او تضيف
وتحس بالرعشة ف ايديك
وان النهاية بتناديك
كل الحاجات فيك انطفت
ماشية في ضدك بتعاديك
بيعاني جسمك م الهُزال
والصحة منك ف اعتزال
والعضم أصبح كله هش
والعمر لملم ف العِزال
وتعيش مابين اربع حيطان
ظابط حياتك ع الآدان
حِمل المرض جاثم عليك
والحشو بايت في الودان
تقعد تفكر ف اللي فات
وتنام ف حضن الذكريات
وتلاقي بكره مش أكيد
واللي ف سِنك كله مات
محصور في حالة انكسار
ممنوع عليك اي انتصار
هو كده حال الزمن
وادي اللي كان وادي اللي صار
يعني تعيش من غير حياة
راجل عجوز محني الجباة
ياخدوا بايدك لو تقع
ويسايسوا فيك لو قلت آه
عيني عليكِ ياصحتي
دلوقتي جاية تعيطي؟!
وعرفتِ إيه معنى الشباب؟
إياكِ تنسي و تغلطي
والقطر فاتح ع السريع
ياتنول مرادك او تضيع
وكل سهل بدايته صعب
وكل ارض وليها ريع
ليست هناك تعليقات:
إرسال تعليق