بستأذنك
لو تُخرجى
من بين ضلوعى الموجوعين
من غير عياط
الوقت فات
وماعادش فاضل غير أنين الذكريات
قلبى اللى كان لك مرتعك
وتملي نبضه بيسمعك
ويسمعك أحلى الكلام والأمنيات
قفل البيبان
وابتدى عصر السُكات
وده من زمان
من يوم ما شافك
وانتى واقفه تكلمى ابن الجيران
على سلم البيت اللى أقرب يشتكى
من وقفتك وياه ساعات
وايديكى بتضم ف ايديه
وعينيكى بتشاغل عينيه
وما بين كلامكو ع الهوى
ميت ألف ميل م التنهيدات والتسبيلات
بستسمحك
لو تخرجى
من قلب رافض يسمعك
من غير كلام
وبلاش غرورك يخدعك
ويفهمك
ان الحلال راح يتفق ويا الحرام
لا عاد كلامك
يفرح القلب الحزين
ولا حتى لمسة شفتك
تحيي اللى مات
من معطيات همس الحنين
ولا دمعتك
هتهز نبضى اللى احترم معنى الثبات
بستأذنك
لو تُخرجى
من غير قلق
وكفاية عمرى اللى انسرق
وورد خدى اللى اتقطف قبل الميعاد
ماعاد يفيد
دمع العيون
ولا عاد يفيد كُهن البنات
ما عاد يفيد
تترجى قلبى يكون ملاك
ويصُر حزنه ف الوريد بعد الممات
****************************
رضا أبو الغيط
ليست هناك تعليقات:
إرسال تعليق