ما كل الحروف كات بريئة زمان
و كانت بتضحك و تطرح امان
صحيح كت تهزر
و جايز بتفشر
و تحلو اكتر
و تبدر حنان
كانت بتشاركني ف بأكتب و اقول
قصايد جميلة تراعي الأصول
ف اهلي و ناسي
و افرق تماسي
و لو كنت ناسي
تجيب لي الحلول
و كت ناس بتقري و تفهم معاني
و لو حاجة غامضة بتقراها تاني
ما كنتش باعافر
و بينهم باسافر
بقى الحرف كافر
عايزني اعاني
تملي بيمكر و يعمل كبير
و يهرب تملي و يغطس ف بير
انادي و اهاتي
فيقرف حياتي
و الاقي سكاتي
ملازي الاخير
احايله و اطبطب و ابوس فوق ايديه
اوشوش ودانه و بامسح عنيه
فمرة يطاوع
و الفين يلاوع
تجف المدامع
الملم مشاعري و احلق عليه
يدوب بيت و يرجع يسوق الدلال
و يقفل عليا طريق السؤال
يسيبني ف حيرة
و بلوي كبيرة
حكاية خطيرة
بتصبح محال
فلو يعني الاقي حروف من جديد
هاجلجل و ارتب و أحاول و اعيد
و هاكتب قصايد
بشوقي اللي زايد
تعم الفوايد
و ما ابقاش بليد
و لو حد عنده حروف بالسلف
تكون لسة طاهرة ما عرفت تلف
يسلفني حبة
دليل ع المحبة
تكون لسه شابة
و ضد الصلف
ما تبقاش غريبة على السامعين
و لا ع الكتابة تقبل تلين
هاحافظ عليها
و اطلع ما فيها
و اعيش عبد ليها
و عمري ما اهين
هاشيلها ف عيني و اشيل الجميل
تنام جنب مني و يحضنها ليل
ف هتكون حبيبتي
و أبواب مدينتي
فتصبح سفينتي
و شراعي الأصيل
ليست هناك تعليقات:
إرسال تعليق